مقدمة الدستور بتقول إن ده دستورنا احنا المواطنات والمواطنين، وقال الدستور احنا الشعب المصري ودي ارادتنا وده دستورنا.

وقال نكتب دستور يحقق المساواة بينا في الحقوق والواجبات من غير أي تمييز، يعني من الأول كده مفيش تفرقة بين راجل وست كلنا متساووين.

والأهم كمان ان الدستور لما حب يتكلم عن الستات وحقوقها اتكلم عنهم في باب – الدولة والمقومات الأساسية- وده طبعا يعني تقدير أكتر للستات انه يتكلم عنهم في باب مهم بالشكل ده وتأكيد علي أهميتهم ودورهم في الدولة والمجتمع.

في المطبوعة اللي معاكم دي حوالي 19 مادة بتتكلم عن حقوق الستات، فيها كلام عنها بشكل مباشر وفيها كلام تاني بس مش بشكل مباشر يعني بيتكلم عن حقوق كل المواطنين وبما ان الست مواطنة في المجتمع يبقي أكيد الكلام ده ليها هي كمان، فلما يتكلم مثلا عن العشوائيات أو الريف أو العمل غير الرسمي يبقي الكلام ده يعم الستات أكتر أنهم الحقيقة هم التعبانين في العشوائيات والريف وقطاعات العمل غير الرسمية وغيرها.

والحقيقة المطبوعة دي ممكن يقراها كل الناس وتبقي سهلة لكن، احنا مقدمينها مخصوص لستات مصر اللي تعبوا ونزلوا ووافقوا علي الدستور لأنه كان أمل بالنسبة لهم ان الدستور ينتبه لأهمية الستات ودورهم في المجتمع ويخصهم بمواد يتكلم عنهم فيها وكان لازم الستات ديه زي ما نزلوا وكان لهم دور في خروج الدستور بشكله النهائي، كمان من حقهم انه يكون مكتوب بلغة سهلة ومش صعبة عليهم ويقدروا يفهموها بسهولة، ولإنهم مهمين جدا ومهم لهم انهم يعرفوا اد ايه الدستور اهتم بيهم، عملنالهم التبسيط ده عشان يبقوا بيتكلموا علي دستور بين ايديهم وسهل عليهم مش دستور صعب كلامه ولا مش مفهوم كل الفاظه.